इटहरी उवा संघमा दलीय राजनीति तोडियो, अध्यक्षमा गायत्री कटुवाल विजयी

इटहरी/ इटहरी उद्योग वाणिज्य संघको निर्वाचनमा स्वतन्त्र उम्मेदवार गायत्री कटुवाल भण्डारी अध्यक्षमा निर्वाचित भएकी छन् । एमाले–कांग्रेस समर्थित संयुक्त उम्मेदवार नवराज काफ्लेलाई १५ मतले पराजित गर्दै उनले संघको इतिहासमा पहिलो महिला अध्यक्ष बन्ने कीर्तिमान कायम गरेकी हुन् ।

निर्वाचन अधिकृत तथा संघका पूर्वअध्यक्ष टंक दुलालका अनुसार कटुवालले ७५८ मत प्राप्त गरिन् भने उनका निकटतम् प्रतिस्पर्धी काफ्लेले ७४३ मत पाए । कुल १ हजार ५४२ मत खसेको निर्वाचनमा ४१ मत बदर भएको थियो । अध्यक्ष पदको मतपरिणाम आइतबार राति सार्वजनिक गरिएको हो ।

इटहरीमै जन्मिएर व्यवसायमार्फत स्थापित कटुवालको जितलाई उद्योग वाणिज्य संघको निर्वाचनमा लामो समयदेखि देखिँदै आएको राजनीतिक गठबन्धनको अभ्यासमाथिको चुनौतीका रूपमा हेरिएको छ । उनले स्वतन्त्र उम्मेदवारका रूपमा चुनाव लड्दै प्रमुख राजनीतिक दलको समर्थन प्राप्त उम्मेदवारलाई पराजित गरेकी हुन् । संघको निर्वाचन असार २७ गते इटहरीस्थित ज्योति माध्यमिक विद्यालयमा सम्पन्न भएको थियो । मतगणनापछि अन्तिम नतिजा संघको सभाहलबाट सार्वजनिक गरिएको हो ।

यसैगरी, एसोसिएट सदस्यतर्फ विनोद पौडेल र वस्तुगत सदस्यतर्फ संयोज पराजुली निर्विरोध निर्वाचित भए । महिला सदस्यमा सुमित्रा भट्टराई र मिना ढकाल निर्वाचित भएका छन् । उद्योगतर्फ शिवप्रसाद भट्टराई (भूपाल), अभिषेक बस्नेत, किशनकुमार खेडिया र हरिप्रसाद तिम्सिना निर्वाचित भए । वाणिज्यतर्फ दिनेशप्रसाद धमला, बलबहादुर न्यौपाने, सन्नी चौधरी, संजय साह, सञ्जीव खड्का, जीवनकुमार न्यौपाने, महेश थापा, बलराम बस्नेत र सिनेट रिजाल कार्यसमितिमा निर्वाचित भएका छन् ।