युनिकोड
विनिमय दर
सुन चाँदि
राशिफल
मौसम
शेयर बजार
पात्रो
इटहरी । पूर्वी नेपालको इटहरी सहरसहित तराईका जिल्लाहरुमा अप्रत्याशित रूपमा गर्मी बढेर जनजीवन प्रभावित तुल्याएको छ । चर्को घाम र अत्यधिक तापक्रमका कारण दैनिक कामकाजमा कठिनाइ भएको छ भने सर्वसाधारणको स्वास्थ्यमा समेत नकारात्मक असर देखिन थालेको छ ।
लामो समयसम्मको हिउँदे खडेरीपछि केही दिनअघि परेको वर्षाले मौसममा केही शीतलता ल्याए पनि, त्यो क्षणिक मात्र साबित भयो । अहिले फेरि बढेको अत्यधिक गर्मीले विशेष गरी दैनिक ज्यालादारी गर्ने मजदुर, किसान र ज्येष्ठ नागरिकलाई बालबालिका बढी प्रभावित भएका छन् । दिउँसोको चर्को घाममा काम गर्न असहज भएपछि धेरैले आफ्नो दैनिक कार्य तालिका परिवर्तन गर्न बाध्य भएका छन् ।
गर्मीको प्रत्यक्ष असर मानिसहरूको स्वास्थ्यमा देखिन थालेको छ । चिकित्सकहरूका अनुसार बढ्दो गर्मीका कारण आँखा पोल्ने, टाउको दुख्ने, रिँगटा लाग्ने, शरीर चिलाउने, झाडापखाला र डिहाइड्रेसन जस्ता समस्याहरू लिएर अस्पताल आउने बिरामीको सङ्ख्यामा वृद्धि भएको छ । यसै गरी, बालबालिका र वृद्ध वृद्धामा यसको जोखिम झनै बढी देखिएको छ ।
गर्मीको प्रकोपलाई मध्यनजर गर्दै स्थानीय प्रशासन र स्वास्थ्य संस्थाहरूले आवश्यक सावधानी अपनाउन आग्रह गरेका छन् । प्रशस्त मात्रामा पानी पिउन, घाममा सकेसम्म कम निस्कन, हल्का र सुतीका कपडा लगाउन, र स्वास्थ्यमा कुनै समस्या देखिए तुरुन्त चिकित्सकको परामर्श लिन सुझाव दिइएको छ। साथै, विभिन्न सामाजिक सङ्घ संस्थाहरूले शीतल पानी वितरण तथा जनचेतनाका कार्यक्रमहरू सञ्चालन गर्न थालेका छन् ।
यद्यपि, गर्मीको यो बढ्दो लहर कहिलेसम्म जारी रहने हो भन्ने यकिन जानकारी मौसम पूर्वानुमान महाशाखाले अझै दिएको छैन। तर, वर्तमान अवस्थालाई हेर्दा तत्काल राहत मिल्ने सम्भावना कम देखिएको छ। यसले गर्दा चितवनलगायत देशभरका नागरिकहरू थप त्रासमा रहेका छन् । सरकारले पनि गर्मीबाट नागरिकलाई जोगाउन थप प्रभावकारी कदम चाल्नुपर्ने आवश्यकता देखिएको छ ।
खगेन्द्र कार्की
