युनिकोड
विनिमय दर
सुन चाँदि
राशिफल
मौसम
शेयर बजार
पात्रो
काठमाडौं । नेपाल फेन्सिङ संघको आयोजनामा सातदोबाटोस्थित तेक्वान्दो कभर्ड हलमा सनिवार देखि सातौँ राष्ट्रिय फेन्सिङ च्याम्पियनसिप,औपचारिक रूपमा सुरु भएको छ। दुई दिनसम्म सञ्चालन हुने प्रतियोगितामा देशभरका सातै प्रदेशका टोलीहरूको सहभागिता रहेको छ।
प्रतियोगिताको उद्घाटन समारोहमा नेपाल फेन्सिङ संघका केन्द्रीय अध्यक्ष सुनिल कुमार श्रेष्ठ, प्रदेश संघका पदाधिकारी, खेलप्रेमी तथा विभिन्न क्षेत्रका विशिष्ट व्यक्तिहरूको उपस्थिति रहेको थियो। उद्घाटनसँगै सुरु भएका प्रतिस्पर्धात्मक खेलहरूमा खेलाडीहरूले उत्कृष्ट कौशल, रणनीतिक क्षमता तथा अनुशासित प्रदर्शन प्रस्तुत गरेका थिए।
बागमती प्रदेश फेन्सिङ संघका अध्यक्ष निराकरमान सिंह रेग्मीले फेन्सिङ नेपालमा लामो इतिहास बोकेको खेल भए पनि अपेक्षित रूपमा जनस्तरसम्म विस्तार हुन नसकेको बताए। उनले यस्ता राष्ट्रिय प्रतियोगिताले नयाँ खेलाडी उत्पादन, प्रतिभा पहिचान तथा खेलको लोकप्रियता अभिवृद्धिमा महत्वपूर्ण योगदान पुर्याउने विश्वास व्यक्त गरे।
प्रतियोगितामा पुरुष तथा महिला खेलाडीहरूले फोइल एपे विधामा प्रतिस्पर्धा गर्दै आफ्नो उत्कृष्ट प्रदर्शनमार्फत पदकका लागि संघर्ष गरिरहेका छन्। प्रतियोगिताले आगामी अन्तर्राष्ट्रिय प्रतियोगिताका लागि राष्ट्रिय टोली छनोट तथा खेलाडीहरूको स्तर मूल्याङ्कनमा समेत सहयोग पुग्ने अपेक्षा गरिएको छ।
फेन्सिङलाई विश्वकै प्राविधिक, रणनीतिक र द्रुत गतिका खेलमध्ये एक मानिन्छ। खेलमा खेलाडीको मानसिक एकाग्रता, प्रतिक्रिया क्षमता, सन्तुलन र शारीरिक फिटनेसको विशेष भूमिका रहने गर्दछ। यही कारणले पछिल्ला वर्षहरूमा नेपालमा पनि यस खेलप्रति युवापुस्ताको आकर्षण क्रमशः बढ्दै गएको खेलकर्मीहरूको भनाइ छ।
आयोजकका अनुसार प्रतियोगिताबाट उत्कृष्ट प्रदर्शन गर्ने खेलाडीहरूलाई सम्मान तथा पदक प्रदान गरिनेछ। साथै राष्ट्रिय तथा अन्तर्राष्ट्रिय स्तरमा नेपालको प्रतिनिधित्व गर्न सक्ने प्रतिभावान खेलाडीहरू पहिचान गर्ने उद्देश्यले प्रतियोगिता सञ्चालन गरिएको हो।
नेपालमा फेन्सिङ खेलको विकास र विस्तारका लागि यस्ता राष्ट्रिय प्रतियोगिताहरू महत्वपूर्ण आधार बन्ने विश्वास आयोजकले व्यक्त गरेका छन्।
सुप्रिया राई
